Hasi da Agoizko egur planta berria eraikitzen

Dagoeneko hasi dira Agoizko industrialdean zura industrializatzeko fabrika berria eraikitzeko eta urbanizatzeko lanak. Duela gutxi, Nafarroako Gobernuak proiektu hori kontratatzeko baimena eman zion Nasuvinsari. Lizitazioaren zenbatekoa 5.352.500 eurokoa da, BEZik gabe. Construcciones Guillén izanen da obra eginen duen enpresa, eta kalkuluen arabera, lanek 6 hilabete inguru iraunen dute. Nasuvinsatik adierazi dutenez, 2024ko abendurako proiektua amaituta egonen litzateke.

Zehazki, Nasuvinsak industria-nabe bat egiteko eta haren ingurua urbanizatzeko inbertsioa eginen du, Ensambla Madera Madergia Taldeko enpresak alokairu bidez (25 urteko epean eta erosteko aukerarekin) ustiatuko duena. Pabiloian zurezko eta bestelako material jasangarrizko eraikuntza-elementuak eginen dira. Aktibitateak honako azalerak hartuko ditu: lantegiak, 9.979 m²; bulegoek, 325 m²; eta kanpoko urbanizazioak, 20.239 m².

50 lanpostu sortu nahi ditu Madergiak Agoitzen, ekoizpen planta berri horrekin, eta balio katea handituko du, gutxiago eraldatutako produktuak jasotzeko eta obretarako elementu bukatuagoak lortzeko. Enpresa erreferentea da bere sektorean; izan ere, 900 proiektu baino gehiago garatu ditu eta 19 urteko esperientzia du eraikuntza jasangarri eta energetikoki efizienteak egiten. Gaur egun Antsoainen ditu bulegoak eta produkzio-zentro bat Orikainen.

Agoitzen lantegi berria irekitzea enpresaren inbertsio planaren barruan sartzen da, zurean eta bestelako material jasangarrietan oinarritutako eraikuntza sistemak sortzeko lerro industrial automatizatuak eta robotizatuak garatzeko. Bere jardueraren barruan sartzen da zurezko eraikinak eta egiturak diseinatu, fabrikatu, hornitu eta obran instalatzea.

Komunikabidea: agoitz.eus